29 జూన్, 2012

లగడపాటి కోట్ల రూపాయల మోసం: జగన్ పార్టీ నేత




















హైదరాబాద్: కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్‌పై వైయస్ జగన్ నాయకత్వంలోని వైయస్సార్ కాంగ్రెసు పార్టీ నేత, న్యాయవాది గౌతం రెడ్డి తీవ్ర ఆరోపణలు చేశారు. లగడపాటి రాజగోపాల్, ఆయన కంపెనీ ల్యాంకో ఇన్‌ఫ్రా ఐసిఐసిఐ బ్యాంకును 3 వేల కోట్ల రూపాయల మేరకు మోసం చేసినట్లు ఆయన ఆరోపించారు. హైదరాబాదులోని సోమాజిగుడా ప్రెస్‌క్లబ్‌లో జరిగిన మీడియా సమావేశంలో ఆయన ఆ ఆరోపణలు చేశారు.

లగడపాటి రాజగోపాల్ ప్రజల నుంచి సేకరించిన వందల కోట్ల రూపాయలను తీసుకుని వెళ్లి ఆస్ట్రేలియాలో నష్టాల్లో ఉన్న గ్రిఫిన్ అనే కోల్ కంపెనీని కొనుగోలు చేశారని ఆయన చెప్పారు. గ్రిఫిన్ కంపెనీ పత్రాలను తీసుకుని వచ్చి ఐసిఐసిఐ బ్యాంకులో కుదువ పెట్టి 3 వేల కోట్ల రూపాయల రుణం తీసుకున్నారని ఆయన చెప్పారు. ప్రస్తుతం ల్యాంకో ఇన్‌ఫ్రా షేరు భారీగా పతమైందని, ఐసిసిఐసి బ్యాంకుతో పాటు ఇన్వెస్టర్లు తీవ్రంగా నష్టపోయారని ఆయన చెప్పారు.

రాజగోపాల్ ల్యాంకో ఇన్‌ఫ్రా ఉదంతంపై సిబిఐతో పాటు ఎన్‌ఫోర్స్‌మెంట్ డైరెక్టరేట్, సెబి కూడా దర్యాప్తు చేపట్టాలని ఆయన కోరారు. ఈ సంస్థలు స్పందించకపోతే న్యాయపోరాటం చేస్తామని ఆయన చెప్పారు. లగడపాటి రాజగోపాల్‌పై లోకసభ స్పీకర్ మీరా కుమార్‌కు కూడా ఫిర్యాదు చేస్తామని ఆయన చెప్పారు.

1 వ్యాఖ్య:

శ్యామలీయం చెప్పారు...

రాజగోపాల్, ఆయన కంపెనీ ల్యాంకో ఇన్‌ఫ్రా ఐసిఐసిఐ బ్యాంకును 3 వేల కోట్ల రూపాయల మేరకు మోసం చేసినట్లు గౌతం రెడ్డి ఆరోపించారు.

ఐసిఐసిఐ యేమన్నా ప్రభుత్వరంగ సంస్థా మోసం చేస్తే చూస్తూ ఊరుకోవటానికి? పోలీసులకో, న్యాయస్థానానికో యెందుకు ఫిర్యాదు చేయలేదు? గౌతం రెడ్డి గారు కాస్త యీ విషయం కూడా స్పష్టపరచవలసి ఉంది.

పోనీ గౌతం రెడ్డిగారే ఐసిఐసిఐ బ్యాంకు కన్నా ముందే మోసాన్ని పసిగట్టారా? శభాష్! అలాగైతే ఆయనన్నా పోలీసులకో, న్యాయస్థానానికో ఫిర్యాదు చేసారా చేయలేదా?

నేరం జరిగిందని మీడియాలోనా ఫిర్యాదు చేసేది మొదటగా? నేరం యెవరు చేసినా నేరమే లగడపాటికేమీ మినహాయింపు యివ్వనవుసరం లేదు. జగన్మోహనరెడ్డికీ మినహాయింపు యివ్వనవుసరం లేదు!